巴黎自由行

今日去左凱旋門, 又係一出地鐵站就到~

其實巴黎自由行真係好容易,

大部分景點都係地鐵站出口,

但由於景點同景點其實好近,

如果可以問下人教路, 直情可以行過去!

車來車往, 好難影到相...

由於無上去參觀, 影幾張相就去了~

本來稔住搭地鐵去羅浮宮,

但搵唔到地鐵站,

問問人, 原來一直行就到,

行左半個鐘左右,

已經經過左協和廣場, 杜樂禮花園,

杜樂禮花園圍住噴水池有好多位可以坐, 甚至訓,

好多人拎本書, 買杯咖啡,

就係度坐一個下晝~

我行完羅浮宮都係度訓左成個鐘!

完全感受到陽光同埋微風係幾咁舒服~

羅浮宮又係好多人排隊...

而家有3DS租借服務,

只要行到去名畫前面, 就會有不同語言的講解服務

羅浮宮入面風景都好靚,

而且有好多位, 行一陣又可以坐~

舒舒服服可以行幾個鐘~

巴黎自由行

本來稔住參加荷蘭去巴黎的LOCAL TOUR,

但係香港出發前1日先知唔成團,

唯有到左荷蘭先訂去巴黎的旅遊巴士及巴黎的酒店,

今次搭EUROLINES,

搭左7個鐘,中途會停2-3次, 

可以係油站去廁所或者買下食物,

訓下醒下, 好快到左巴黎!

由於我係搭通宵巴士,

11點上車,第2朝6點幾就到左巴黎,

巴士落車站係正地鐵站上面,

先搭地鐵去酒店!

巴黎的地下鐵站真係好臭...

地下鐵路線好易睇,

同香港好似, 指示都好清楚,

職員都好肯幫人, 但唔太識英文,

最好先寫低想去的地方的法文, 方便問人! 

好快到左酒店, 但由於未可以CHECK IN,

寄存行李後先去左艾菲爾鐵塔EIFFEL TOWER,

酒店位置實在太方便,

行過去 EIFFEL TOWER唔使10分鐘,

行到過去,  EIFFEL TOWER 都未開...

但一到8點半, 突然好多旅行團出現,

全部人排隊等開門,

見勢色唔對, 我都即刻去排隊,

好彩等左9個字已經可以上去,

點解話等左9個字都好彩?

因為當我落黎的時候,

已經打晒蛇餅, 起碼2個鐘先上到去!!!

確實 EIFFEL TOWER 上面景色好靚!

我上左最高果層~

一直以為係地標入面的紀念品店買野會貴少少,

點知當我行過好多間紀念品店之後發現,

最平最齊的係 EIFFEL TOWER 入面果間...

EIFFEL TOWER 對面有個好靚的旋轉木馬

之後去左老佛爺百貨公司,

幫家姐買個LV, 再去左最低果層拎封退稅信(到機場要再搞的)

行左一陣就返酒店~

黎到巴黎當然要食MACARON~